മൈട്രൽ റിഗർജിറ്റേഷൻ
വാൽവ് ലീഫ്ലെറ്കൾക്ക് കേടുപാടുകൾ സംഭവിച്ചതിന്റെ ഫലമായോ പാപ്പില്ലറി പേശികളുടെ പ്രവർത്തനം തകരാറിലായതിനാലോ മൈട്രൽ വാൽവിലെ ലീക്ക് അഥവ മൈട്രൽ റിഗർജിറ്റേഷൻ ഉണ്ടാകാം. ഇടത് വെൻട്രിക്കിൾ കൂടുതലായി വലുതാകുമ്പോളും ഇത് ഉണ്ടാകാം. വികസ്വര രാജ്യങ്ങളിൽ മൈട്രൽ വാൽവുലൈറ്റിസിന്റെ ഫലമായി എംആർ ഉണ്ടാകാനുള്ള ഒരു പ്രധാന കാരണമാണ് റുമാറ്റിക് ഫീവർ. വികസിത രാജ്യങ്ങളിൽ റുമാറ്റിക് ഫീവർ വിരളമാണ്. അവിടങ്ങളിൽ മൈട്രൽ വാൽവ് പ്രോലാപ്സും ഡീജനറേറ്റീവ് മിട്രൽ വാൽവ് രോഗവുമാണ് കൂടുതൽ കാണുന്നത്. എംആറിന്റെ തീവ്രത കണക്കാക്കുന്നത് റിഗർജിറ്റന്റ് ഫ്രാക്ഷൻ അളന്നു കൊണ്ടാണ്. എൻഡ് ഡയസ്റ്റോളിക് വോളിയത്തിന്റെ ഒരു ഭാഗം ഇടത് ഏട്രിയത്തിലേക്ക് ലീക്ക് ചെയ്യുന്നു, ഇതിനെ റിഗർജിറ്റന്റ് ഫ്രാക്ഷൻ എന്ന് വിളിക്കുന്നു. ഡോപ്ലർ എക്കോകാർഡിയോഗ്രാഫിയിലൂടെയും ആൻജിയോകാർഡിയോഗ്രാഫിയിലൂടെയും ഇത് കണക്കാക്കാം.
എംആർ വർദ്ധിക്കുന്നതിനനുസരിച്ച് ഇടത് വെൻട്രിക്കിളും ഇടത് ഏട്രിയവും ക്രമേണ വികസിക്കുന്നു. ഇടത് വെൻട്രിക്കിൾ വികസിക്കുമ്പോൾ, മിട്രൽ ആനുലസ് വലുതാകുകയും കൂടുതൽ ലീക്ക് അനുവദിക്കുകയും ചെയ്യുന്നു. അതുകൊണ്ടാണ് “എംആർ എംആറിനെ വർദ്ധിപ്പിക്കുന്നു” എന്ന് പലപ്പോഴും പരാമർശിക്കപ്പെടുന്നത്. ഗുരുതരമായ MR-ൽ ഇടത് വെൻട്രിക്കിൾ പരാജയപ്പെടുമ്പോൾ ഇടത് വെൻട്രിക്കുലാർ എൻഡ് ഡയസ്റ്റോളിക് മർദ്ദം വർദ്ധിച്ചേക്കാം. ക്രോണിക് മൈട്രൽ റിഗർജിറ്റേഷനെ അപേക്ഷിച്ച് ഇത് അക്യൂട്ട് എംആറിൽ കൂടുതലാണ്. ഇടത് വെൻട്രിക്കുലാർ എൻഡ് ഡയസ്റ്റോളിക് മർദ്ദം ഉയരുന്നത് ഇടത് ഏട്രിയൽ മർദ്ദം, പൾമണറി വീനസ് മർദ്ദം എന്നിവ ഉയരുന്നതിലേക്ക് നയിക്കുന്നു. ഇത് ഉയർന്ന പൾമണറി കാപ്പിലറി മർദ്ദത്തിനും പൾമണറി എഡിമയ്ക്കും ഇടയാക്കും. കഠിനമായ ക്രോണിക് മൈട്രൽ റിഗർഗിറ്റേഷനിൽ റിയാക്ടീവ് പൾമണറി ആർട്ടീരിയൽ ഹൈപ്പർടെൻഷൻ ഉണ്ടാകാം.
മൈട്രൽ വാൽവ് റിപ്പയർ വഴിയും മൈട്രൽ വാൽവ് മാറ്റിസ്ഥാപിക്കുന്നതിലൂടെയും ഗുരുതരമായ മൈട്രൽ റിഗർജിറ്റേഷൻ ശസ്ത്രക്രിയയിലൂടെ ചികിത്സിക്കാം. റുമാറ്റിക് മൈട്രൽ റിഗർജിറ്റേഷന്റെ മൈട്രൽ വാൽവ് പലപ്പോഴും റിപ്പയറിന് അനുയോജ്യമല്ല, മാറ്റി വെയ്ക്കേണ്ടത് ആവശ്യമാണ്. നിലവിൽ കൂടുതൽ ചെലവേറിയതാണെങ്കിലും മൈട്രൽ വാൽവ് റിപ്പയറിനുള്ള പെർക്യുട്ടേനിയസ് താക്കോൽ ദ്വാര ടെക്നിക്കുകളും ഉണ്ട്. മൈട്രൽ വാൽവ് ഒരു മെക്കാനിക്കൽ പ്രോസ്റ്റസിസ് ഉപയോഗിച്ച് മാറ്റിക്കഴിഞ്ഞാൽ, ആജീവനാന്തം രക്തം കട്ടപിടിക്കുന്നത് തടയുന്ന മരുന്നുകൾ നിർബന്ധമാണ്. പ്രോത്രോംബിൻ ടൈം ടെസ്റ്റിലൂടെ രക്തം കട്ടപിടിക്കുന്നതിനുള്ള പ്രവർത്തനം പതിവായി നിരീക്ഷിക്കേണ്ടതും ആവശ്യമാണ്.
