ഹൃദയമിടിപ്പ് ഇരുപതുകളിൽ ഉള്ള ഇഡിയോവെൻട്രിക്കുലാർ റിഥത്തിന്റെ ചികിത്സ എന്താണ്?
ഹൃദയത്തിന്റെ താഴത്തെ അറകളായ വെൻട്രിക്കിളുകളിൽ നിന്ന് ഉത്ഭവിക്കുന്ന സ്വതസിദ്ധമായ ഹൃദയ താളമാണ് ഇഡിയോവെൻട്രിക്കുലാർ റിഥം. ഇഡിയോവെൻട്രിക്കുലാർ റിഥത്തിന്റെ സാധാരണ നിരക്ക് മിനിറ്റിൽ 20 മുതൽ 40 വരെ ആണ്. നിരക്ക് 20-ൽ ആയിരിക്കുമ്പോൾ, തലകറക്കം, കണ്ണ് ഇരുട്ടടക്കൽ എന്നിവ പോലുള്ള തലച്ചോറിലേക്കുള്ള രക്തയോട്ടം കുറവായതിന്റെ ലക്ഷണങ്ങൾ ഉണ്ടാകാൻ സാധ്യതയുണ്ട്. കൂടാതെ, കുറഞ്ഞ നിരക്കുകൾ ടോർസേഡ്സ് ഡെ പോയിന്റ് പോലെയുള്ള ജീവന് ഭീഷണിയായ അസാധാരണമായ ഹൃദയ താളത്തിന് കാരണമാകും. ടോർസേഡ്സ് ഡെ പോയിന്റ് വളരെ വേഗത്തിലുള്ള ഹൃദയ താളമാണ്, ഇത് പലപ്പോഴും ഹൃദയത്തിന് ശരിയായ രീതിയിൽ സങ്കോചിക്കാൻ കഴിയാത്തതിനാൽ പൾസ് അപ്രത്യക്ഷമാകാൻ കാരണമാകുന്നു.
അതുകൊണ്ട് ഇത്തരം സന്ദർഭങ്ങളിൽ ഹൃദയമിടിപ്പ് വർദ്ധിപ്പിക്കുന്നതാണ് നല്ലത്. സിരകളിലൂടെ തുടർച്ചയായി ഡ്രിപ് ആയി നൽകുന്ന മരുന്നുകൾ വഴി ഇഡിയോവെൻട്രിക്കുലാർ റിഥം ത്വരിതപ്പെടുത്താനാകും. ഒരു സിരയിലൂടെ വലത് വെൻട്രിക്കിളിലേക്ക് ഒരു ഇലക്ട്രോഡ് കടത്തുകയും പേസ്മേക്കർ ഉപയോഗിച്ച് ഹൃദയത്തെ ത്വരിതപ്പെടുത്തുന്നതിന് വൈദ്യുത സിഗ്നലുകൾ നൽകുകയും ചെയ്യുക എന്നതാണ് കൂടുതൽ മെച്ചപ്പെട്ട മാർഗം. ഇഡിയോവെൻട്രിക്കുലാർ റിഥം സ്ഥിരമായ കാരണത്താലാണ് സംഭവിക്കുന്നതെങ്കിൽ, ഒരു പെര്മനെന്റ് പേസ്മേക്കർ ചർമ്മത്തിനടിയിൽ സ്ഥാപിക്കുകയും ഒരു ഇലക്ട്രോഡ് വഴി ഹൃദയവുമായി ബന്ധിപ്പിക്കുകയും ചെയ്യാം.